(ВИДЕО) Возат во спротивен правец, кочат без причина … Еве го списокот на сите досегашни незгоди со роботакси возилата на Tesla
Воведувањето на Tesla роботакси возилата беше многу потурбулентно отколку што би сакале да признаат фановите и инфлуенсерите – кои беа меѓу првите што добија пристап.
Со помош на вредни корисници на Reddit, порталот The Verge состави список на сите грешки што „неконтролираните“ возила на Tesla ги направиле во првите денови на сообраќај.
Од мали грешки до потенцијално смртоносни ситуации
Некои грешки се релативно мали – како на пример нераспознавање на UPS камион кој се движел наназад при паркирање или преминување преку раб на тротоар. Но, други се многу посериозни – како кратко возење во спротивна лента или оставање патници среде крстосница.
Фантомско кочење
Неколку инциденти вклучуваат т.н. „фантомско кочење“, кога возилото нагло кочи без очигледна причина. Системот за перцепција на Tesla, кој се потпира исклучиво на камери, одамна се соочува со овој феномен – возилото погрешно ги толкува сенките, ознаките на патот или други фактори од околината, што активира итно автоматско кочење.
На листата на Reddit се регистрирани три случаи на фантомско кочење.
Останатите документирани инциденти вклучуваат:
- обид на возилото да влезе на паркинг без да забележи камион што се движи наназад
- возење преку тротоарски раб
- погрешно препознавање на сообраќајни ленти
- оставање патници на несоодветна локација – вклучувајќи и сообраќајна крстосница
Tesla тврди дека собира повратни информации од корисниците со цел подобрување на услугата.
Сојер Мерит, корисник на X (поранешен Twitter) познат по својата поддршка за Tesla, напиша дека во 20-те возења за два дена немал никакви проблеми. „Без интервенции, без критични безбедносни ситуации. Сите мои возења беа мазни и комфорни,“ објави тој.
Но списокот укажува дека искуството не било исто за сите.
И сето ова го знаеме само затоа што корисниците ги документираат и објавуваат случаите на социјалните мрежи.
Што можат сојузните држави?
Тексас моментално не бара од Tesla да поднесува официјални извештаи за инциденти или да споделува податоци – иако државата неодамна одобри нов систем на лиценцирање, кој би можел да претставува поголем предизвик за компанијата.
Една одредба им овозможува на регулаторите да ја одземат лиценцата доколку автономното возило се процени како безбедносен ризик.
Милион до крајот на годината?
Важно е да се има предвид дека сите овие инциденти се случиле во рамки на мал возен парк од само 10 до 20 возила во првите три дена (полујавна) достапност на овие самоуправувачки такси возила. Илон Маск најави дека сака илјадници вакви возила на патиштата во следните месеци – па дури и „милион“ до крајот на следната година.
Замислете како би изгледала листата на инциденти тогаш.
