(ВИДЕО) Што сè нема да им падне на памет на Русите: Направија Лада со два мотори

Оваа тјунерска работилница го подига „направи сам“ инженерството на ново ниво.

Garage 54 е познат по своите луди проекти, но нивниот најнов потфат ги поместува границите на „направи сам“ инженерството. Тимот создаде огромна Лада, базирана на стар советски модел, и реши дека ваков уникатен автомобил заслужува подеднакво посебен погонски склоп.

Два мотори – двојно повеќе забава

Во масивниот простор за мотор, инженерите вградија два мотори со запремнина од 1.6 литри. Секој од нив произведува околу 76 коњски сили, а тимот ги постави паралелно, поврзувајќи ги со метална конструкција.

Моторите се синхронизирани преку ланчан механизам, сличен на оној кај мотоциклите, кој ја комбинира нивната сила и ја пренесува кон менувачот преку осовина. Поради огромната големина на автомобилот, менувачот е поместен наназад, во кабината, за да може возачот удобно да ја користи рачката за менување брзини.

Ентериер – исто луд како и екстериерот

Внатрешноста на автомобилот е вистинска атракција. Наместо стандардни предни седишта, инженерите вградиле две огромни фотелји, како од дневна соба, што совршено се вклопува во масивните димензии на Ладата.

На задното седиште е поставена софа, која служи како задна клупа, а за да додадат допир на луксуз, тимот вградил и лустер– што го прави овој автомобил апсолутно уникатен!