Залог за иднината: Инвестираат уште 500 милиони во летечкo такси

Јапонската компанија Toyota Motor најави дека ќе инвестира уште 500 милиони долари во американската фирма Joby Aviation и нејзиното производство и сертификација на електрични летечки такси.

Инвестицијата ќе биде во форма на готовина за обични акции, при што првата транша ќе се затвори подоцна оваа година, а втората транша во 2025 година, пренесува Ројтерс.

Тојота претходно инвестираше 394 милиони долари во оваа компанија, па вкупната вредност на инвестицијата сега изнесува 894 милиони долари.

Електричните возила за вертикално полетување и слетување (eVTOL) се прогласуваат за иднината на урбаниот транспорт, но досега компаниите што ги произведуваат се борат да добијат регулаторни одобренија.

Joby Aviation објави дека го унапредува процесот на комерцијализација и сертификација на летечки такси и неодамна отвори проширен објект во Калифорнија.

Претседателот на Toyota Motor Северна Америка, Тед Огава рече дека одржливиот воздушен транспорт е клучниот збор за денешните „упорни предизвици за мобилност“.