(ФОТО) Американец доби Porsche 911 GT3 RS на наградна игра – дивееше и го уништи

За многу љубители на автомобили, поседувањето вистински спортски автомобил е сон што трае цел живот. Со оглед на високите цени на модели како Porsche, Lamborghini или Ferrari, за мнозина тој сон останува неостварен.

Но, понекогаш среќата се насмевнува и на обичните луѓе. Некои успеваат да дојдат до вакви автомобили бесплатно – преку наградни игри. Токму затоа е уште поголема фрустрацијата кога ќе уништите возило што веројатно никогаш не би можеле да си го дозволите. Тоа му се случи на еден млад човек од Невада, САД.

Го доби на наградна игра од Tuner Cult

Сте чуле за Tuner Cult? Станува збор за американска онлајн продавница што продава облека инспирирана од автомобилската култура – маици, дуксери и слично – но и редовно организира наградни игри. Концептот е едноставен: ако купите нешто, автоматски учествувате во извлекувањето. Дури и ако не нарачате ништо, можете да купите дигитален купон за учество (во вредност од 50 до 250 долари).

Уништен Porsche 911 GT3 RS

Пред околу седум месеци, Tuner Cult организираше наградна игра со главна награда – Porsche 911 (991) GT3 RS во впечатлива ултравиолетова (Ultraviolet) боја. Среќникот што го доби автомобилот вреден над 220.000 евра беше 32-годишниот Стивен Дојл од гратчето Фернли во Невада. Но, неговата радост не траеше долго – за кратко време целосно го уништи автомобилот.

Според извештајот на полицијата од округот Стори, несреќата се случила на автопат. Дојл возел со голема брзина, премногу брзо влегол во свиок, се обидел да избегне друго возило со нагло свртување надесно, по што удрил во заштитна ограда и излетал од патот, па се стркалал низ насип.

Уапсен по несреќата

Тука не завршуваат проблемите. Дојл заврши во притвор – уапсен е под сомнение дека управувал возило под дејство на алкохол и при тоа имал и огнено оружје во возилото.

Единствената утеха што му остана? Заедно со автомобилот доби и 50.000 долари во готовина.