ФОТО: Ова е најмоќниот V12 мотор некогаш вграден во патнички автомобил

Данскиот производител на суперавтомобили Zenvo можеби не е име што секој го препознава, но зад сцената тивко подготвува нешто што многу гласно ќе се слушне. Проектот наречен Aurora се развива со години, толку долго што за неговиот V12 мотор под хаубата знаеме речиси две години.

Во Zenvo и натаму целат кон вкупна моќност од 1850 коњски сили, а сега конечно имаме појасна слика за тоа како планираат да ја постигнат таа бројка. Резултатот: најмоќниот V12 мотор што некогаш бил вграден во сериски патнички автомобил, пишува Carscoops.

Станува збор за 6.6-литарски мотор, симболично наречен Mjølner, по чеканот на Тор. Комбинира четири турбополначи и хибриден систем, се врти до неверојатни 9800 вртежи во минута, и користи Mahle Jet Ignition технологија за контрола на емисиите. Моторот е целосно рачно изработен и ќе овозможи максимална брзина до 450 km/h.

Од Zenvo истакнуваат дека посветиле особено внимание на секојдневната употребливост, што можеби звучи неочекувано за автомобил со речиси две илјади коњски сили. Дури и без хибридниот систем, моторот сам по себе развива 1250 коњски сили.

„Моќно, сурово искуство“

„Една од клучните цели при развојот на Aurora беше да се создаде емоционална поврзаност со возачот и патниците – автомобил што ќе ги разбуди сите сетила,“ објаснува Јенс Свердруп, извршен директор на Zenvo Automotive.

„Звукот и моќното, сурово чувство на возење се основата на Aurora. Моторот е срцето на целата приказна, и ќе го однесеме до крајните граници. Ние во Zenvo сме вистински ентузијасти за автомобили. Не се создава секој ден нов V12, така што ова за нас е извонреден и горд момент – конечно го претставуваме Mjølner“, додава тој.

„Тоа што моторот стана најмоќниот V12 во светот за патнички автомобил не беше планирана цел – тоа е резултат на постојано поместување на границите на можното. Ова е огромен чекор напред, а следниот ќе биде да го видиме и слушнеме во акција. Моторот е развиен за да воодушеви на сите нивоа, што покажува колку далеку стигнавме“, вели Свердруп.

Првиот примерок на Aurora е веќе готов

На прв поглед е јасно дека станува збор за вистинско инженерско ремек-дело. Турбополначите се релативно компактни и сместени длабоко меѓу двете линии цилиндри, во т.н. „hot V“ конфигурација. Голем дел од моторот е покриен со топлотна изолација, за да се осигура оптимално функционирање.

Според информации од Zenvo, првиот примерок на Aurora е веќе завршен и моментално се наоѓа во финална фаза на тестирање. Zenvo Aurora ќе се нуди во две верзии:

• Tur – ориентирана кон GT-возење
• Agil – дизајнирана за тркачка патека

Од секоја верзија ќе бидат произведени по 50 примероци. Цената е најавена на околу 2.6 милиони евра, а производството ќе трае до крајот на следната година.