Германија воведува активна пензија: Идните пензионери добиваат 2.000 евра без данок
Активната пензија е дел од претстојните коалициски преговори во Германија. Што носи новиот концепт на ЦДУ и каде лежи проблемот? ЦДУ веќе неколку пати јавно ја презентираше оваа идеја, која е дел од основната програма на партијата, но и од изборната програма.
Што значи активно пензионирање?
Идејата зад овој концепт е дека секој што ќе ја достигне законската возраст за пензионирање и ќе одлучи да продолжи да работи може да заработува до 2.000 евра месечно (24.000 евра годишно) без данок. Тоа би значело дека даночната поволност е речиси двојно зголемена.
ЦДУ сака да ги охрабри граѓаните да останат во работен однос подолго, но без задолжителна должност. Целта е да се растерети пензискиот фонд и да се обезбеди стабилно ниво на пензиите преку поголем економски раст.
Дополнително, оние кои подоцна заминуваат во пензија не само што подоцна почнуваат да ја добиваат пензијата, туку и подолго придонесуваат во пензискиот фонд. Тоа значи повеќе средства за финансирање на пензиите во иднина.
Експертите се скептични за активното пензионирање
Сепак, експертите имаат бројни забелешки за овој модел.
Истражувач од Германскиот економски институт (IW) во Келн истакнува дека активната пензија би можела да биде во судир со актуелните закони.
„Овој вид регулатива го нарушува принципот на способност за плаќање“, вели таа.
Дополнителен проблем е што овој модел би зафатил само мал број пензионери, бидејќи е наменет исклучиво за оние кои сакаат доброволно да работат по 66 години. Од друга страна, просечниот германски граѓанин оди во пензија на 64 години, што значи дека речиси половина од пензионерите не би биле опфатени со овие мерки.
Експертите веруваат дека се потребни подобри стимулации за да се задржат повеќе луѓе на пазарот на труд до редовната возраст за пензионирање, наместо да заминат порано.
Позитивни ефекти врз економијата
Компанијата „Прогнос-АГ“ уште во ноември 2024 година во име на „Иницијативата за нова социјална пазарна економија“ (ИНСМ) анализираше какви ќе бидат економските ефекти доколку повеќе пензионери продолжат да работат по законската старосна граница.
Резултатите покажаа дека во најдобро сценарио би можеле да останат вработени дури 300.000 дополнителни пензионери, со што економската вредност би се зголемила за 18,2 милијарди евра. Државата би можела да собере до 5,2 милијарди евра дополнителни даноци и социјални придонеси, а трошењето индиректно би отворило до 60.000 нови работни места.
Во најпесимистичкото сценарио, доколку дополнително би работеле само 50.000 пензионери, економскиот ефект би бил значително помал – зголемување на економската вредност за 3,6 милијарди евра, зголемување на даноците и социјалните придонеси за 1,3 милијарди евра и отворање на околу 20.000 нови работни места.
Сепак, оваа анализа не се осврнува конкретно на моделот на ЦДУ на активно пензионирање, туку на општата економска придобивка од повеќе постари луѓе кои остануваат на работа.
