Доколку го скинете ова цвеќе, казната е 13.000 евра!
Казната за берење на заштитената сорта лалиња на планината Спил, во турската провинција Маниса, оваа година достигнува речиси 13.000 евра.
Станува збор за лалињата од Маниса (Tulipa orphanidea), кои цветаат само еднаш годишно во Националниот парк на планината Спил, а нивниот цвет трае само десет дена, пренесува „Hurriyet“.
Овие лалиња обично цветаат кон крајот на април или почетокот на мај, во зависност од временските услови.
Новинарот и фотограф на природа, Али Гезен (26), кој учествува на натпревари со фотографии од овие ретки цветови, изјави дека смета оти казната треба дополнително да се зголеми заради нивната уникатност и важност за екосистемот.
Минатата година, казната за берење на лалињата од Маниса изнесувала околу 8.900 евра, што значи дека оваа година значително е зголемена за да се одвратат прекршителите и да се заштити природното наследство.
