Секоја ноќ слушала тропање на таванот – синовите ѝ велеле дека си замислува, а кога дознале што се крие над нив – замрзнале од страв

Понекогаш слушаме чудни звуци во куќата – шкрипење, шумолење – и најчесто помислуваме дека е ветер, инсталација или некоја безопасна појава. Повеќето од нас едноставно го игнорираат тоа. Но, за една жена од Рок Хил, Јужна Каролина, звуците што ги слушаше од таванот во 2012 година се покажале како нешто многу посериозно – и лично застрашувачко.

Трејси, мајка на пет деца, почнала да забележува повремено чукање и тропкање од таванот. Кога се пожалила на своите синови, тие не ѝ поверувале дека станува збор за нешто сериозно. За да ја смират, се искачиле на таванот да проверат – но не откриле ништо сомнително.

„Децата ми велеа: ’Мамо, си замислуваш, старееш, слушаш нешта што не постојат“, раскажа Трејси. Но чувството дека нешто не е во ред не ја напуштало – и на крајот се покажало дека била во право. Во бизарен пресврт, откриено било дека нејзиниот поранешен партнер, од кој се разделила пред 12 години и кој неодамна излегол од затвор, тајно се криел на нејзиниот таван цели две недели.

Една вечер, додека работела на лаптопот во својата спална соба, дел од таванот почнал да се руши, а малтерот паднал директно врз нејзиниот кревет. Тоа бил моментот кога сфатила дека повеќе не може да ги игнорира звуците. Во друг инцидент, се разбудила околу 2:30 по полноќ поради необичен шум и решила да ги повика синовите и внукот повторно да го проверат таванот.

„Постојано слушав тропање, чукање. Го познавам звукот на мојата куќа. Знаев дека горе има некој – или нешто“, изјави таа за ABC News.

Кога се искачиле на таванот, во делот каде што немало светло, ги дочекало вознемирувачко откритие – поранешниот партнер на Трејси лежел во близина на грејниот систем. Ситуацијата станала уште побизарна кога откриле дека користел пластични чаши како импровизирана тоалетна.

Трејси изјавила дека за време на неговиот престој во затвор разменувале писма, но дека никогаш не сакала да ја обнови врската, и покрај неговите тврдења дека се променил. Не е јасно како точно влегол во куќата, бидејќи до таванот се пристапува само преку внатрешна врата. Дополнително, поранешниот партнер дури направил измени на вентилационите отвори за да може да набљудува што се случува во собата под него – спалната соба на Трејси.

Пред да пристигне полицијата, тој успеал да побегне.

„Сè уште се обидуваме да сфатиме како влегол. Се чувствувам измамено, вознемирено и сакам да биде обвинет“, изјави Трејси.