Трагедија го потресе американскиот спорт: Убиен фудбалер (17), починал во рацете на својот брат близнак

Тагата и огорченоста ја завладеаја заедницата во Фриско, сојузната држава Тексас, откако училишен атлетски митинг прерасна во трагичен инцидент што одзеде еден млад живот.

Во средата, на стадионот Frisco ISD, дојде до конфликт меѓу двајца 17-годишни ученици, кој заврши со смртоносно прободување со нож. Полицијата во Фриско потврди дека жртвата е Остин Меткалф, додека како осомничен е уапсен Кармело Антони, кој сега се соочува со обвинение за убиство од прв степен.

Само два дена пред трагедијата, Меткалф напиша објава на социјалната мрежа X:

„Верувам дека Бог ме води и дека мојот труд ќе се исплати.“

Во средата наутро, соништата и иднината на овој ученик и спортист од средното училиште Меморијал беа прекинати токму на местото каде што требаше да се одржи атлетското натпреварување.

Според наводите на полицијата, по вербална расправија, Кармело Антони го нападнал Меткалф со нож. Жртвата била пренесена во болница, но подлегнала на повредите.

Откако присутните биле евакуирани, местото на злосторството било покриено со сина ткаенина, а учениците биле вратени во своите училишта со автобуси.

„Го нарекував брат,“ изјави Гевин Стајтс, пријател и соиграч на Меткалф во фудбалскиот тим.

„Заедно игравме американски фудбал и фудбал уште од петгодишна возраст. Ако некогаш ми требаше нешто, тој беше тука за мене.“

Стајтс, кој бил квотербек, а Меткалф негов лајнбекер, истакна дека Остин бил срцето на тимот, секогаш посветен, мотивирачки и сигурен, а на теренот секогаш бил рамо до рамо со својот брат близнак, Хантер.

„Тој беше светлината што нè водеше. Секогаш знаеше како да нè мотивира уште за време на загревањето. Тој не беше само дел од тимскиот дух – тој беше самиот дух,“ рече Стајтс.

Таткото на Остин, Џеф Меткалф, објави емотивна порака на социјалните мрежи, во која откри дека неговиот син починал во рацете на својот брат близнак.

„Оваа трагедија нè потресе мене, нашето семејство и пријателите до срж. Верувам дека Бог ќе нè води низ ова што следува. Среќен сум што тој е на небото. Тоа би му го кажал – и дека Хантер и јас ќе се грижиме за неговата мајка.“

Директорката на училиштето во кое учел Меткалф, Брук Феско, испрати писмо до родителите на учениците:

„Утре наутро, за време на вториот час, ќе одржиме една минута молк во чест на Остин Меткалф. Во текот на целиот ден, учениците ќе имаат поддршка од училишните и дистриктните психолози. Како родители, важно е да разговарате со вашите деца и да бидете со нив во процесот на жалост.“