ФОТО | Јапонија тестира ново и премоќно морнаричко оружје од кое Американците веќе се откажаа
Додека другите земји се повлекоа, Јапонија решително продолжува со развојот на технологијата на електромагнетен топ за својата воена морнарица.
На социјалните мрежи се појавија нови фотографии што го прикажуваат јапонскиот прототип на електромагнетниот „рејлган“, поставен на крмата на тестниот брод на јапонската морнарица JS Asuka, кој се наоѓа во базата Јокосука. Сликите, првично објавени од корисникот@HNlEHupY4Nr6hRM на мрежата X, покажуваат отстранет заштитен прекрив и техничари кои работат на оружјето, пренесува порталот The War Zone.
Новата верзија на јапонскиот електромагнетен топ изгледа речиси идентично со оној што последниве години го развива и тестира Агенцијата за набавки, технологија и логистика (ATLA) на Јапонија.
Идеални услови за бараниот систем
Отворената крмена палуба на бродот Asuka овозможува идеални услови за тестирање на електромагнетниот топ, избегнувајќи ги ограничувањата поврзани со простор и снабдување со енергија – клучни предизвици за вградување на вакво оружје на оперативни борбени бродови. Во близина на куполата се забележани неколку големи контејнери, за кои се претпоставува дека содржат кондензатори, генератори или системи за ладење, што ги потврдува големите енергетски и термички барања на ова оружје.
ATLA претходно демонстрираше способност за истрелување на проектили со брзина од 2.230 метри во секунда (мах 6.5), користејќи пет мегаџули енергија. Целите на тестирањето опфаќале и постигнување брзина на цевката од 2.000 метри во секунда, како и издржливост на цевката до 120 истрели, според порталот Naval News. Електромагнетните топови се соочуваат со големо абење поради високата енергија при секој истрел, што влијае на прецизноста и го зголемува ризикот од дефекти.
Според Yahoo Japan, морнаричките тестирања се планирани во периодот од 9 јуни до 25 јули. Бродот Asuka ја напуштил Јокосука на 9 јуни, но засега не е познато дали веќе е извршено испалување од електромагнетниот топ. Aviation Week уште во мај најави дека тестот ќе се одржи во јуни.
Стратешката визија на јапонската морнарица
На саемот DSEI Japan 2025, ATLA претстави покомпактна верзија на куполата за електромагнетниот топ, што навестува можност за негова инсталација на разурнувачи од класата 13DDX. Јапонскиот вицеадмирал Имајоши Шиничи во 2024 година јавно потврди дека постојат планови за интегрирање на ова оружје на бродовите од флотата.
Додека американската морнарица до 2022 година се откажа од својот проект за развој на електромагнетен топ, Јапонија продолжува со својата програма. Претставници на ATLA се сретнаа со американски функционери со цел да ги искористат претходните истражувања на САД. „Како што се доближуваме до оперативната примена, верувам дека ќе се прошири обемот на соработка со САД,“ изјави Козуми Ито од ATLA за време на панел на споменатиот DSEI саем, според National Defense Magazine.
Кина, Турција, Франција, Германија …
Кина уште во 2018 година постави електромагнетен топ на еден од своите воени бродови. Турција, како и јапонските партнери Франција и Германија, исто така активно работат на развојот на оваа напредна технологија.
Очекуваните тестирања на бродот Asuka наскоро би можеле да откријат колку е Јапонија навистина блиску до официјално воведување на ова оружје од новата генерација во својата воена морнарица.
