Овој град важи за најевтин во светот и вистински е магнет за туристите: Историски скапоцен камен што маѓепсува

Хој Ан зрачи со магична атмосфера.

Меѓу туристите, сè поголема популарност добива Хој Ан, град во Виетнам, кој минатата година беше прогласен за најевтин град во светот според истражувањето Светски барометар на трошоците за одмор, спроведено од една британска компанија.

Овој град се издвојува по прекрасните плажи и пријатните температури, кои во април достигнуваат до 28 степени. Посебно познати се плажите Ан Банг и Куа Даи.

Најдобро време за посета е од февруари до април, кога температурите се пријатни. Во летните месеци, особено од мај до август, времето е многу топло, додека есента може да донесе обилни дождови.

Хој Ан е еден од најдобро зачуваните историски градови во Азија. Жолтите куќи со дрвени балкони, уличките украсени со светилки и традиционалната архитектура создаваат магична атмосфера, особено навечер.

Историски гледано, Хој Ан бил важно пристаниште, па затоа тука можат да се забележат архитектонски влијанија од Кина, Јапонија и Европа.

Секој полн месец се одржува традиционалниот Фестивал на светлината, кога реката се украсува со илјадници пловечки светилки. Туристите можат да купат светилка, да посакаат желба и да ја пуштат низ реката.

Истражувањата покажуваат дека цените во Хој Ан се исклучително пристапни. Пола литар пиво чини околу 1.40 евра, крема за сончање 4.40 евра, а ноќевање во хостел се движи од 5 до 10 евра. Во хотели со четири или пет ѕвезди, цените се меѓу 50 и 100 евра, често со вклучени спа услуги и појадок.

Градот е идеален за велосипедизам, а изнајмување велосипед чини од еден до два евра по ден. Кратки возења преку апликацијата Grab, азискиот еквивалент на Uber, чинат до пет евра, а за истата сума може да се изнајми и мотор за еден ден.

Некои од најважните атракции во градот вклучуваат Јапонскиот покриен мост, симбол на градот од 16 век, старата куќа Тан Ки, која е спој на виетнамска, кинеска и јапонска архитектура, како и пазарот Хој Ан, кој е рај за гурманите и љубителите на часови за готвење.

Во близина на Хој Ан се препорачува да се посетат My Son Sanctuary, древни хиндуистички храмови сместени во џунгла, кои често ги нарекуваат малиот Ангкор Ват, градот Дананг, познат по Златниот мост што го држат големи камени дланки, како и градот Хуе, некогашна царска престолнина со импресивни царски гробници.

Хој Ан е познат и како град на кројачи, каде што многу туристи си заминуваат со ново одело или фустан шиен по мерка, по цени кои се движат до 100 евра.

Кога станува збор за гастрономијата, најпознати јадења се Pho супата, која е подготвена од ароматичен бујон, оризови нудли, зачини и месо, Banh mi сендвичите, кои содржат мек багет полнет со различни видови месо, свеж зеленчук и зачинети сосови, како и Cao Lau, специјалитет кој може да се проба само во Хој Ан, подготвен со дебели оризови нудли, свинско месо и свежи билки.

Покрај овие јадења, вреди да се проба и кафето со јајце, кое многумина го опишуваат како необично, но извонредно вкусно.

Ако барате град кој нуди магична историја, вкусна храна и пристапни цени, тогаш Хој Ан е вашата следна дестинација.