Продуцентите на Спајдермен и Хари Потер снимаат нов филм за Џејмс Бонд

Американскиот филмски продуцент Ејми Паскал и британскиот филмски продуцент Дејвид Хејман ќе го продуцираат следниот филм за Џејмс Бонд – нивниот прв филм откако стекнаа креативна контрола врз иконската франшиза, соопшти студиото “Amazon MGM”.

Паскал е најпознат по трите најнови филмови за Спајдермен со Том Холанд во главната улога, додека Хејман ги продуцираше сите осум филмови за Хари Потер.

Кортни Валенти, шеф на филмскиот оддел на студиото Amazon MGM, ги опиша како „двајца од најуспешните, искусни и најпочитувани филмски продуценти во филмската индустрија“.

Во заедничката изјава, Паскал и Хејман го нарекоа познатиот агент 007 „еден од најпознатите ликови во историјата на кинематографијата“.
Долгогодишните креатори на франшизи Барбара Броколи и Мајкл Г. Вилсон во февруари објавија дека се повлекуваат, предавајќи ја креативната контрола на студиото Амазон, кое беше формирано откако Амазон ја купи франшизата Бонд во 2022 година.

Филмовите за Бонд се појавија во 1962 година.

„Почестени сме“

„Почестени сме да ги следиме стапките на Барбара Броколи и Мајкл Вилсон, кои создадоа толку многу извонредни филмови и возбудени што го одржуваат духот на Бонд жив додека тој тргнува во неговата следна авантура“, велат Паскал и Хејман.

Валенти, раководител на филмскиот оддел на Амазон, додаде: „Почестени сме што работиме со нив на следното поглавје на Џејмс Бонд и возбудени сме да и донесеме на глобалната публика приказна која достојно ќе го продолжи беспрекорното наследство на овој сакан лик“.

Новата соработка доаѓа во време на растечките шпекулации за судбината на британскиот шпион, четири години од неговото последно појавување во “No Time To Die”, кој воедно беше петти и последен филм на Даниел Крег во оваа улога.

По минатомесечната објава, извршниот директор на Амазон Џеф Безос ги праша своите 6,8 милиони следбеници на Х: „Кого би го избрале за следен Бонд?”

Амазон и неговите нови продуценти сега ќе донесат одлука за тоа кој ќе ја преземе иконската улога, но сè уште нема временска рамка за избор на нов актер или започнување со снимање на следниот филм.

Меѓу омилените се Џејмс Нортон, Арон Тејлор-Џонсон и Тео Џејмс.

Паскал неодамна го продуцираше филмот Ривали со Зендаја во главната улога, како и анимираната серија Спајдермен.

Хејман моментално е во претпродукција на серијата за Хари Потер, а работи и на филмската адаптација на романот Клара и сонцето на Казуо Ишигуро, во режија на Таика Ваитити, со Џена Ортега и Ејми Адамс во главните улоги.

Холивудското продукциско дуо заедно работи и на Џеј Кели на Ноа Баумбах, со Џорџ Клуни и Адам Сендлер во главните улоги.