Психолог открива пет клучни лекции за среќен брак
БРАК е повеќе од романтична приказна – тоа е секојдневно партнерство полно со љубов, но и предизвици. Иако често започнуваме полни со ентузијазам и очекувања, со текот на времето сфаќаме дека добар брак бара постојана посветеност, трпение и подготвеност да расте. Психологот Марк Траверс открива пет важни, но често занемарени вистини кои можат да помогнат да ја одржите вашата врска силна и здрава – дури и кога е најтешко.
- Љубовта не е доволна
Многумина веруваат дека љубовта е сè што е потребно за среќен брак. Но, љубовта сама по себе нема да ги реши разликите во карактерите, вредностите или комуникацијата. Она што навистина го одржува бракот е посветеноста, трудот и подготвеноста за адаптација, објаснува Траверс за “CNBC Make It”. Љубовта е важна, но секојдневните одлуки и начинот на кој се однесуваме едни со други ја прават разликата.
- Расправиите се нормални
Митот дека „вистинските парови не се караат“ може да биде штетен. Вистина е дека конфликтите се неизбежни – и дека можат да бидат од корист. Проблемот не е во тоа што се карате, туку како. Здравата дискусија ја отвора вратата за искрен разговор за потребите и желбите, што води до подлабоко разбирање. Клучот е да научите да се расправате „праведно“ – без обвинување, навреда или замолчување, истакнува Траверс.
- Партнерот не е тука за да ги исполни сите ваши потреби
Многумина влегуваат во брак со идејата дека партнерот ќе им биде се – најдобар пријател, психолог, мотиватор, рамо за плачење… Но, таквите очекувања создаваат притисок и често доведуваат до разочарување. Психологот посочува дека здравите парови го негуваат и сопствениот идентитет – хоби, пријатели и лични цели. Силен брак значи две стабилни личности кои избираат да растат заедно.
- Бракот бара постојана инвестиција
Заљубувањето можеби на почетокот изгледа лесно и спонтано, но како што доаѓаат секојдневните обврски – работа, деца, стрес – врската лесно паѓа во втор план. Бракот, исто како автомобилот, не може да се одржува без редовен „сервис“. Планирани моменти за двајца, искрени разговори и свесно негување на блискост се клучот за долгорочниот успех, објаснува Траверс.
- И двајцата ќе се промените
Личноста со која се омаживте на 25 нема да биде иста на 45. И тоа е во ред. Луѓето растат, се менуваат, а со нив и нивните потреби и погледи на светот. Психологот истакнува дека најуспешни парови се оние кои не се плашат од оваа промена, туку ја прифаќаат како можност повторно да се заљубат еден во друг.
