Го намалува гладот и ја зголемува енергијата и расположението: Работи што треба да ги правите откако ќе се разбудите за подобро регулирање на шеќерот во крвта
Ненадејни скокови и падови на шеќер може да предизвикаат замор, глад, раздразливост и да го зголемат ризикот од хронични болести како што се отпорност на инсулин и дијабетес
Управувањето со шеќерот во крвта започнува веднаш откако ќе се разбудите. Навиките што ги практикувате, од тоа што јадете до тоа колку се движите, може значително да влијаат на стабилноста на шеќерот во крвта во текот на денот.
Одржувањето здраво ниво на шеќер во крвта придонесува за стабилна енергија, подобро расположение, подобрена концентрација и многу повеќе.
Од друга страна, ненадејните скокови и падови на шеќер може да предизвикаат замор, глад, раздразливост и да го зголемат ризикот од хронични болести како отпорност на инсулин и дијабетес.
Групата на диететичари Eating Well препорачува да ги вклучите следните чекори во вашата утринска рутина за да помогнете во управувањето со шеќерот во крвта.
Хидрирајте веднаш по будењето
Еден од наједноставните и најефикасните начини за регулирање на шеќерот во крвта е да го започнете денот со чаша вода. Диететичарката Стејси Вудсон препорачува да се испие една до две чаши вода веднаш по будењето.

Водата помага за разредување на вишокот гликоза во крвта, ја поддржува работата на бубрезите во елиминацијата на шеќерот и придонесува за стабилизирање на нивото на шеќер во текот на денот. Ако обичната вода не ви е привлечна, можете да ја збогатите со парче краставица, цитрус или билки.
Започнете го денот со појадок богат со протеини и влакна
Диететичарот Трејси МекКелви истакнува дека на јаглехидрати сме особено чувствителни наутро, па затоа е корисно денот да го започнеме со оброк кој не содржи многу од нив. Ова е особено важно за луѓето со дијабетес.
„Истражувањето покажува дека појадокот со помалку јаглени хидрати не само што помага во контрола на утринскиот шеќер во крвта, туку има и долгорочни придобивки во текот на денот, подобрувајќи ја регулацијата на шеќерот после ручек и вечера“, тврди МекКелви.
Комбинацијата на протеини и влакна го забавува варењето, овозможува постабилно ниво на шеќер во крвта и го намалува ризикот од скокови на гликоза после оброкот. Примери за здрав појадок вклучуваат омлет со зеленчук и авокадо, интегрален тост со путер од кикирики или грчки јогурт со бобинки и јаткасти плодови.
Внимавајте на внесот на кофеин
Иако многумина не можат да замислат утро без кафе, прекумерното внесување на кофеин може привремено да го зголеми нивото на шеќер во крвта. Според некои истражувања, потрошувачката на кофеин над 250 милиграми дневно (околу две и пол шолји кафе) може да доведе до зголемување на шеќерот во крвта.

Кофеинот го стимулира ослободувањето на хормони како што е адреналинот, што го поттикнува црниот дроб да ослободува гликоза во крвотокот.
За да ги намалите можните скокови, пијте кафе со избалансиран оброк и размислете за намалување на дневниот внес. Додавањето протеини, на пример во форма на протеински прав во кафето, може да помогне да се забави апсорпцијата на гликоза.
Физичка активност
Утринската физичка активност може значително да придонесе за одржување на здрави нивоа на шеќер во крвта. Движењето ги активира мускулите да користат гликоза за енергија, а со тоа ја намалува количината на шеќер во крвотокот.
Вежбањето не мора да биде интензивно – истегнување, јога или брзо одење можат да направат голема разлика. Истражувањата покажуваат дека вежбањето со умерен интензитет кратко време по оброкот може да го намали нивото на гликоза во крвта после јадење.