Дали знаевте дека само овие комарци ги касаат луѓето?

Најлесниот начин за разликување меѓу машките и женските комарци се нивните антени, а женките се генерално и поголеми од мажјаците.

Комарците се познати по тоа што ги касаат луѓето и пренесуваат бројни болести, но изненадувачки, полот на овие штетници игра клучна улога во тоа однесување. Кога се говори за машки и женски комарци, тие можат да се разликуваат според начинот на исхрана, големината и изгледот. Мажјаците најчесто се хранат со нектар од цвеќиња, додека на женките им е потребна крв за да произведат јајца.

Наједноставен визуелен показател се антените – мажјаците имаат перјасти (чупави) антени кои им помагаат да ги почувствуваат вибрациите на крилјата на потенцијалните партнерки. Спротивно на тоа, антените кај женките се попрости по изглед. Женките, исто така, имаат и посебна структура на устата – нивниот рилец е прилагоден да ја пробие човечката кожа. Женките обично се и поголеми од мажјаците.

Роењето на мажјаци и женки комарци е честа појава во топли и влажни области. Овие инсекти можат да се размножуваат во каква било застоена вода – од најмала количина вода во чаша или капак, до поголеми бари. Затоа е исклучително важно да се овозможи добра дренажа и да се избегнува задржување на вода. Носењето светла облека и покривање на голата кожа, исто така, може да помогне во одвраќање на комарците.

Комарците можат да ве детектираат од неколку десетици метри, користејќи го јаглеродниот диоксид што го издишувате. За само неколку секунди, тие се насочуваат кон откриен дел од кожата и почнуваат да се хранат со вашата крв, користејќи низа специјализирани „иглички“.

Иако генерално само женките комарци пијат крв, истражување на Универзитетот во Мелбурн покажува дека и мажјаците можат да бидат еднакво досадни. Истражувањето ја побива вообичаената заблуда дека мажјаците ги избегнуваат луѓето. Всушност, мажјаците на барем една честа врста веројатно ве „сакаат“ исто како и женките – но причината за таа „наклонетост“ и начинот на кој ја покажуваат е сосема различна. Се смета дека сè се врти околу пронаоѓањето женки. Бидејќи женските комарци често се во близина на луѓето, мажјаците што ја делат таа склоност имаат поголеми шанси за репродуктивен успех.