Дали знаете што значи логото на Мерцедес?

Мерцедес го промени своето препознатливо лого на почетокот на 2025 година, без голема медиумска најава. Од февруари, во сите официјални комуникации на компанијата, ѕвездата повеќе не е прикажана во тродимензионална, хромирана верзија, туку во рамна, бела форма. Новиот дизајн може да се види на социјалните мрежи, во електронската пошта, во годишниот извештај и писмата.

Мерцедес тајно го смени логото

Од компанијата објаснуваат дека целта на новиот визуелен идентитет е модернизација и адаптација на дигитални формати. Рамниот 2Д дизајн, велат тие, работи подобро на екраните и придонесува за визуелната конзистентност на брендот. Промената беше направена внатрешно и не вклучуваше кампања за јавноста.

„Ја намалуваме употребата на црна боја во корпоративната палета и се префрламе на 2Д верзија на ѕвездата за печатени и дигитални медиуми. Тридимензионалната верзија ќе продолжи да се користи за возила и архитектонски елементи“, велат од Mercedes.

Ова не е првпат Мерцедес да проба рамна верзија на логото. Првиот обид се случи во 2007 година, но брзо беше напуштен. Во 2010 година, за време на мандатот на тогашниот извршен директор Дитер Цетче, 3Д ѕвездата беше вратена поради нејзиниот попрестижен впечаток.

Како е создадена легендарната трокрака ѕвезда?

Логото на Мерцедес се базира на ѕвездата со три краци која датира од 1909 година. Ѕвездата ја симболизира амбицијата на компанијата да развие мотори за копно, воздух и море. Идејата ја замислил Готлиб Дајмлер на крајот на 19 век, а ѕвездата првично се користела на разгледници и промотивни материјали. Официјално беше регистриран како заштитен знак за прв пат на 9 февруари 1911 година.

Во 1926 година, по спојувањето на Daimler-Motoren-Gesellschaft и Benz & Cie, беше создаден брендот Mercedes-Benz. Новата верзија на логото ги комбинираше трикрака ѕвезда и ловоров венец, претходно користени од компанијата на Бенц.

Во текот на децениите, логото се менуваше неколку пати – се менуваа материјалите, димензиите и визуелниот стил, но трокраката ѕвезда остана константна. Златната боја беше заменета со сребрена, која денес е заштитен знак на естетиката на Мерцедес.

Последните големи промени во дизајнот се случија во 2011 година, кога беше претставен префинет тридимензионален изглед на логото, кој остана стандард до денес. Симболиката на ѕвездата е задржана повеќе од 100 години и стана еден од најпрепознатливите автомобилски симболи во светот. Без оглед на многубројните редизајни, неговото основно значење никогаш не е изгубено.

Новиот дизајн го следи трендот на дигитална едноставност

Новото лого на Mercedes сега е бело, рамно и минималистичко, без сенки, без 3D ефекти и без рефлексија. Минималистичкиот дизајн стана доминантен тренд во автомобилската индустрија во последниве години, особено кај производителите кои се фокусираат на електрични возила. Слична насока веќе избраа и брендовите како Volkswagen, BMW и Renault.

Иако новото лого предизвикува различни реакции – некои го сметаат за модерно, други го сметаат за премногу едноставно – компанијата нагласува дека промената нема да влијае на изгледот на возилото. Тридимензионалната ѕвезда ќе продолжи да ги краси капаците на моторот, воланот и бандажите.