„Дали ќе ни забранат да пиеме кафе“: Европската унија воведува нови ограничувања, кофеинот е означен како штетен за луѓето
Според новиот извештај на Европската унија, кофеинот може да има голем број штетни ефекти.
Европската унија во регулативата со која се забранува употребата на кофеинот како пестицид, објави дека кафето е штетно за луѓето, пишува Телеграф.
Како што е објаснето, постојат научни докази кои ги поткрепуваат тврдењата дека „кофеинот е штетен за луѓето доколку се проголта“. Во извештајот се вели дека кофеинот, главната состојка во кафето, може да има штетни ефекти врз срцето, хидратацијата и температурата на телото и може да предизвика анксиозност и проблеми со спиењето.
Исто така, се додава дека се потребни повеќе истражувања за да се открие дали кофеинот претставува ризик за луѓето кои работат со него или живеат во близина на местото каде што се обработува.
Извештајот беше објавен за да се поддржи одлуката да се забрани употребата на кофеин во полињата со зелка и компири. Сепак, содржината на оваа објава предизвика загриженост дека регулативите еден ден би можеле да го загрозат пиењето кафе, една од главните карактеристики на европскиот начин на живот.
Андерс Вистисен, дански пратеник во Европскиот парламент и член на Патриоти за Европа, рече: „Повеќе несакани и непотребни одлуки и ново мешање од бриселските бирократи. До што води ова? Дали тие навистина ќе не принудат да пиеме кафе без кофеин на крајот? Ова станува смешно.”
Вистисен рече дека последниот извештај потсетува на обидот на Брисел да ги забрани ролатите со цимет. Имено, едно данско пециво морало да се преквалификува како „традиционална“ храна за да се избегне ограничување од ЕУ за кумаринот, соединение во циметот кое е отровно во големи дози.
„Пред неколку години, ЕУ сакаше да го забрани циметот во данските колачи, а синдикатот на пекарите мораше да се бори за тоа.”
Пекарите исто така имаа проблеми со забраната за титаниум диоксид и други бои за храна, па мораа да ги преработат рецептите за да не мора да ги повлекуваат производите од пазарот на ЕУ.
