Научници од МИТ создадоа светлечки бактерии кои испраќаат хемиски пораки до дронови од воздухот

Научници од МИТ постигнаа револуционерен напредок во биотехнологијата, генетски модификувајќи бактерии кои емитуваат светлина во видливиот и инфрацрвениот спектар. Оваа светлина, активирана со присуство на одредени хемикалии, може да се детектира со дронови или сателити опремени со хиперспектрални камери. Технологијата овозможува далечинско читање на податоци од биолошки системи, значително проширувајќи ја примената на бактериските сензори во реални услови – од земјоделие до безбедносни апликации.

Досега, бактериските сензори можеа да детектираат хемикалии како загадувачи или хранливи материи, но бараа специјализирана опрема и близина. Новиот систем користи светлосни сигнали што може да се детектираат и од растојание до 90 метри. Клучниот елемент се т.н. „хиперспектрални репортери“ – молекули кои светат кога бактеријата доаѓа во контакт со целната супстанца. Камерата потоа го препознава специфичниот светлосен потпис и така ги чита податоците.

Бактериите биле тестирани на отворено, поставени во кутии на покриви и пустински терени. Дронови успешно регистрирале кои примероци се активирани. Системот моментално може да детектира елементи како арсен, но е доволно флексибилен за да се приспособи на следење на азот во почвата, детекција на мини, па дури и работа во внатрешноста на растителни клетки.

Истражувачите, преку генетски инженеринг, ги избрале молекулите биливердин и бактериохлорофил поради нивните уникатни спектрални карактеристики и едноставна биосинтеза. Овие молекули биле поврзани со сензорите во бактериите, овозможувајќи им светлосна реакција на присуство на метали, токсини или радијација.

Потенцијалната примена е огромна – од прецизно земјоделство, заштита на животната средина, до медицинска дијагностика. Сепак, со напредокот на технологијата, се отвораат и прашања за регулатива, безбедност и етички граници при употреба на генетски модификувани организми.

Оваа иновација претставува почеток на нова ера на биосензорска технологија, во која живи организми ќе можат да комуницираат со технологијата во реално време – и тоа од воздух, пренесува Sustainability Times.