Холандскиот производител го претстави новиот модел, автомобил кој го носи името на бебе
Во исто време, Донкерворт по 25 години ја прекинува соработката со Audi.
Холандскиот производител на автомобили го претстави новиот модел P24 RS, кој останува верен на филозофијата на ултра лесната конструкција, но со една голема промена – повеќе нема да го користи петцилиндричниот мотор на Audi.
Прекин на 25-годишна традиција
Откако F22 Final Five го означи крајот на една ера, Донкерворт сега најави нов болид.
Името P24 RS ја следи традицијата на брендот – буквата „P“ се однесува на Phébe, втората ќерка на Денис Донкерворт , додека бројот „24“ ја означува годината на нејзиното раѓање – 2024 година, пишува “CarScoops”.
Сличен систем беше користен во моделот F22, именуван по првата ќерка на Денис, Филипа, родена во 2022 година.
Ознаката RS доаѓа од моделот D8 270 RS, кој во 2006 година го постави рекордот на серискиот автомобил на легендарниот Nürburgring Nordschleife.
Мистеријата на погонската единица
Во моментов многу малку се знае за моторот што ќе го придвижува P24 RS.
Денис Донкерворт изјави дека тоа ќе биде „целосно нов модел“ и „целосно нова технологија“, сугерирајќи дека моторот би можел да се развива и произведува во куќата.
Што и да прави Донкерворт, едно е сигурно – се очекува уште подобар сооднос моќност и тежина.
Ако новиот модел остане под 750 килограми, би можел да го надмине F22, кој го користеше 2,5-литарскиот турбо петцилиндарец на Audi со 500 КС.
Со оглед на тоа дека F22 од 0 до 100 km/h забрзуваше за само 2,5 секунди, новиот модел би можел да постави нови стандарди во однос на перформансите и динамиката на возење.
