Германија планира да го ослободи од гонење хакирањето „со добри намери“.

Германската влада предложи нацрт-закон со кој етичкото хакирање, кое има за цел да пронајде безбедносни пропусти, нема да биде забрането со закон.

Според соопштението за печатот на германското Сојузно Министерство за правда, таканаречените “whitehat” хакери не треба да бидат изложени на ризик од кривична одговорност.

Законот, сепак, воведува построги казни за хакирање “blackhat”, особено сериозни случаи на шпионажа и следење податоци.

„Секој што сака да ги поправи недостатоците во ИТ безбедноста заслужува признание, а не писмо од јавниот обвинител“, рече сојузниот министер за правда д-р Марко Бушман. „Во интерес на целото општество е да се откријат и затворат дупките во ИТ безбедноста. Со предлог-законот ќе го исклучиме ризикот од кривична одговорност за лицата кои ја преземаат оваа важна задача“.

Според сегашното кривично право во Германија, секој што ќе добие „неовластен“ пристап до податоците, прави кривично дело. Новиот закон ќе појасни дека постапките на истражувачите за ИТ безбедност не се „неовластени“ и затоа не се казниви.

Во некои тешки случаи на шпионирање и следење податоци, кога сторителот предизвикува поголема загуба на имот или делува од личен интерес, комерцијално или како член на банда, се заканува затворска казна од три месеци до пет години.

„Безбедносните пропусти во ИТ системите може да имаат драматични последици во нашиот поврзан свет. Сајбер-криминалците и странските сили можат да ги користат безбедносните пропусти во ИТ како порти. На овој начин можете да парализирате болници, транспортни компании, електрани, да шпионирате и да крадете лични податоци и да уништувате компании“, рече германскиот министер, нагласувајќи дека поседувањето хакерски алатки не се смета за кривично дело.

Нацртот моментално се разгледува до 13 декември 2024 година, пред да влезе во процедура за усвојување во парламентот.