Оваа голема земја ги забранува социјалните мрежи за деца до 16 години: Дали ова ни треба и во Македонија?

Австралиската влада планира да воведе закон со кој на децата под 16 години ќе им се забрани пристап до социјалните мрежи, во потег што премиерот Ентони Албанес го опиша како „светски пример“.

Главната цел на овој закон е да се намали „штетата“ што социјалните мрежи можат да ја предизвикаат на младите луѓе во Австралија, според Албанес.

Родителите се загрижени за безбедноста на нивните деца на интернет, како и јас“, рече премиерот. „Сакам австралиските семејства да знаат дека владата стои зад нив“.

Предложениот закон ќе биде доставен до парламентот следната недела, а доколку биде усвоен, законот би стапил на сила една година подоцна и би бил предмет на разгледување по имплементацијата.

Поддршка и критика: помеѓу забрана и образование

Предлог-законот предвидува одговорност на социјалните мрежи за спроведување на забраната, а самите деца или млади корисници нема да ги сносат казните. Сепак, забраната не се однесува на младите кои веќе имаат отворени сметки, ниту пак родителската согласност ќе им дозволи на лица под 16 години да пристапат до платформи како TikTok, Instagram и Facebook.

Додека многу експерти ги препознаваат потенцијалните ризици што социјалните медиуми ги претставуваат за менталното здравје на адолесцентите, некои веруваат дека таквите забрани не се најефективниот начин за борба против проблемот. Експертите истакнуваат дека забраната само ја одложува средбата на младите со социјалните мрежи наместо да им помогне да научат како безбедно да се движат во дигиталната средина.

Најголемата австралиска група за правата на децата јавно го критикуваше предложениот закон како „премногу суров“. Во отвореното писмо, потпишано од над 100 академици и 20 граѓански организации, групата ја повика владата да се фокусира на воспоставување безбедносни стандарди на социјалните мрежи, наместо на целосна забрана, пишува Би-Би-Си.

Поддршка на законски предлог за заштита на менталното здравје

Од друга страна, родителите и активистите на локално ниво го поддржаа законот, нагласувајќи дека забраната е неопходна за да се заштитат децата од штетни содржини, дезинформации и насилство од врсници.

Во петицијата на иницијативата „36 месеци“, која собра над 125.000 потписи, се наведува дека „децата сè уште не се подготвени безбедно да се движат по социјалните мрежи“ до 16-годишна возраст.

Иницијативата тврди дека прекумерната употреба на социјалните мрежи го нарушува менталниот развој на младите, предизвикувајќи зголемување на менталните здравствени проблеми кај децата.

Премиерот Албанес смета дека пристапот заснован на едукација на децата за дигиталната безбедност не е доволен, бидејќи „претпоставува дека децата и компаниите имаат подеднакво влијание во дигиталниот простор“. Тој нагласи дека моќта на социјалните мрежи и нивните алгоритми ги надминуваат можностите на младите корисници, што дополнително ја отежнува нивната заштита.