Колку време да поминете на сонце за да добиете доволно витамин Д?

Изложеноста на сонце е од клучно значење за здравјето на луѓето бидејќи е еден од главните извори на витамин Д, кој е неопходен за различни функции во телото.

Сепак, исто така е важно да се најде рамнотежа бидејќи прекумерното изложување на сонце може да го зголеми ризикот од рак на кожата и други проблеми.

Затоа многумина ќе се запрашаат колку време всушност е потребно за да се обезбеди доволно витамин Д. Имено, оптималното време на изложување на сончева светлина зависи од повеќе фактори.

Луѓето со посветла кожа имаат тенденција да произведуваат витамин Д побрзо од оние со потемна кожа. Генерално се препорачува луѓето со светол тен да поминуваат помеѓу 10 и 30 минути на сонце неколку пати неделно.

Во областите поблиску до екваторот, каде што интензитетот на сонцето е поголем, потребно е помалку време да се добијат доволни количини на витамин Д. Спротивно на тоа, на повисоки географски широчини или во текот на зимата, може да биде потребно повеќе време на отворено.

Производството на витамин Д е најефикасно кога сонцето е највисоко, што обично е помеѓу 10 и 15 часот. Во овие часови се препорачува кратко изложување, помеѓу 10 и 30 минути во зависност од типот на кожата.

Патем, витаминот Д игра клучна улога во здравјето на коските, имунолошкиот систем и регулирањето на расположението. Главниот извор на витамин Д е изложувањето на сончева светлина, што и овозможува на кожата да го синтетизира овој витамин.

Без доволно витамин Д, луѓето може да доживеат слаби коски, зголемен ризик од инфекции и ментални проблеми.