Шпанскиот фотограф аматер Анхел Идалго успеал да ја сними првата позната единка на бел ибериски рис – вид познат по својата исклучителна реткост и статус на загрозеност. Фотографијата, чиешто точно место на снимање намерно не е откриено со цел заштита од ловокрадци, претставува значаен доказ за напредокот во зачувувањето на овој редок животински вид на Пиринејскиот (Иберискиот) Полуостров, објави „Euronews“.
Станува збор за рис со леуцизам – генетска аномалија која предизвикува делумен или целосен недостаток на пигмент во крзното, но не и во очите, што го разликува од албино животните. Идалго го забележал овој редок примерок на 22 октомври со фото-камера поставена длабоко во една од планинските области на покраината Хаен, во јужна Шпанија. „Белиот дух на медитеранската шума“ – така го опишал својот необичен наод.
Иако иберискиот рис е предмет на интензивни програми за заштита во Шпанија и Португалија, сè уште е класифициран како ранлив вид според Црвената листа на Меѓународната унија за заштита на природата. Според податоците на шпанското Министерство за еколошка транзиција, популацијата на овие животни во 2023 година ја надминала бројката од 2.000 единки, распоредени во двете земји на Пиринејскиот Полуостров.
Главниот предатор на зајците
Благодарение на програмите за повторно населување, иберискиот рис повторно се шири на подрачја како Сиера Морена, Монтес де Толедо, сливната област на реката Гуадиана на границата меѓу Шпанија и Португалија, како и во природниот резерват Доњана. Неговото присуство сега е забележано и на места што до неодамна се сметаа за невозможни за овој вид, како Сиера Палентина.
Оваа голема мачка, ендемична за Иберискиот Полуостров, игра клучна улога во медитеранските екосистеми и во синџирот на исхрана, бидејќи е главен предатор на зајците – нејзиниот основен извор на храна. Осчезнувањето на иберискиот рис би можел да доведе до преголем раст на популацијата на зајци и до нарушување на рамнотежата во целиот екосистем.
