Девојка на 29 години открила како успева секој месец да остварува дополнителна заработка и со кои финансиски трикови внимателно го вложува и распределува секој денар.
Благодарение на упорноста, финансиската дисциплина и добро испланираниот пристап, оваа 29-годишна Британка веќе обезбедила три стана, заштедила речиси 90.000 евра и има јасна цел – финансиска независност пред да наполни четириесет.
Строга контрола на буџетот и секојдневна заштеда
Чарли Луиз, која годишно заработува околу 48.000 евра, успеала да заштеди импресивни 88.550 евра. На социјалните мрежи отворено го споделува својот метод на штедење – секојдневно одделува по 31 евро, а секоја нова цел ја претвора во личен предизвик, пренесува „Slobodna Dalmacija“.
„Кога ќе соберам првите 1.000 евра, веднаш се прашувам: како можам што побрзо да стигнам до следните 1.000?“, вели таа.
Нејзината формула за успех се темели на доследност – внимателно следење на трошоците, паметни вложувања и речиси целосно избегнување на импулсивни купувања.
Од луксуз до инвестициска стратегија
Некогаш живеела во модерен трособен стан во поскап дел од градот, но го заменила со помал простор кој барал реновирање. Тој потег ѝ ги отворил вратите кон сериозни инвестиции – денес поседува три недвижности што ги издава и така обезбедува стабилен дополнителен приход.
„Голема куќа звучи убаво, но не носи профит. Три помали стана, пак, значат постојан прилив на пари“, објаснува Чарли.
Повеќе извори на приходи
Покрај својата редовна работа, Чарли дополнително заработува преку онлајн истражувања на пазарот, тестирање производи и фриленсинг. Само во септември, покрај платата од 2.989 евра, остварила уште 1.200 евра од кирија и дури 11.500 евра од дополнителни проекти. Секоја дополнителна заработка веднаш ја пренасочува кон заштеда или нови инвестиции.
„Дваесеттите ми се за работа и заработка, триесеттите за слобода“, нагласува таа.
Пет финансиски правила на Чарли
За да ја постигне својата цел – рана финансиска независност, Чарли се придржува до неколку едноставни, но цврсти принципи:
- Минимална потрошувачка: јаде надвор само повремено, а достава на храна нарачува неколку пати годишно.
- Паметни инвестиции: вложува во акции и фондови – досега постигнала 25% од целта од 115.000 евра.
- Дополнителни работи: секој слободен час го користи за дополнителна заработка.
- Детално планирање: секој трошок го бележи, а вишокот го користи за намалување на хипотеката.
- Живот под можностите: месечно издвојува до 230 евра за лични трошоци и избегнува долгови.
Таа верува дека независноста нема врска со среќата, туку со упорноста:
„Слободата не е привилегија резервирана за богатите – тоа е одлука. Со дисциплина и јасна цел, секој може да ја постигне“, вели Чарли.
Додека многу нејзини врсници сè уште размислуваат за својот прв подолг одмор, таа веќе планира како да живее без стрес и финансиски грижи.
