Сите мислеа дека девојчето ја дели трагичната судбина на своите родители, но се покажа дека таа веќе била и мајка и баба.
Страшно откритие во тексашка шума
На 12 јануари 1981 година, локален ловец во Тексас открил две тела во оддалечен, мочурлив дел од шумата. Обдукцијата потврдила дека станува збор за млад маж и жена – можеби дури и тинејџери. Повредите укажувале дека не се работи за несреќа, туку за убиство.
Но вистината за овој случај ќе излезе на виделина дури 40 години подоцна — и ќе го шокира целиот свет.
Почетокот на истрагата
Точниот датум на убиството не можел да се утврди. Поради климата, теренот и присуството на диви животни, полицијата ја поставила временската рамка меѓу една недела и два месеца пред пронаоѓањето на телата.
Никакви документи не биле пронајдени. Останатата облека била обична, без ништо препознатливо. Полицијата веднаш повторно ги отворила сите случаи на исчезнати лица во последните два месеца, но напредок немало. По речиси една година без резултати, телата биле означени како непознати и погребани во необележани гробови.
Пријава за исчезнување на млад брачен пар со бебе
Во исто време, тексашката полиција добила пријава за исчезнат млад брачен пар и нивното едногодишно дете. Никој, сепак, не помислил да ја поврзе исчезнатата фамилија со непознатите тела во мочуриштето.
Во јуни 1979 година, на Флорида — 2.000 километри од Тексас — се венчале дваесетгодишниот Дин Клаус и шеснаесетгодишната Тина Лин. Во јануари 1980 година добиле ќерка. Летото потоа, решиле да се преселат во Тексас во потрага по подобар живот.
Дин нашол работа, а Тина се грижела за детето во изнајмена гарсоњера. Пари им недостигале, но според сведоците, младата двојка живеела во љубов и склад.
Ненадејно прекинат контакт
До октомври 1980 година, семејството престанало да се јавува. Мајката на Дин со месеци се обидувала да го пронајде синот, снаата и внуката. Конечно, во јануари 1981 година — токму кога биле откриени телата во мочуриштето — поднела пријава во полицијата во Остин.
Мрачна врска со верска секта
Мајката открила дека нејзиниот син кратко време припаѓал на маргинална верска секта. Членовите на групата носеле бели облеки и патувале низ Америка „ширејќи ја Божјата реч“. Но нивното учење немало врска со христијанството — било чудна мешавина од библиски цитати, хиндуистички практики и хипи-филозофија.
Полицијата верувала дека Дин се вратил во сектата, поведувајќи ја со себе и својата сопруга и ќерка. Поддршка на оваа теорија било тоа што непознати лица кон крајот на 1980 година го оставиле автомобилот на Дин во Калифорнија и ѝ се јавиле на мајка му, кажувајќи ѝ каде да го најде.
ДНК револуција по 40 години
Во 21 век, САД започнаа национален програм за идентификација на неидентификувани тела. Во земјата има над 270.000 гробови обележани само со број.
Во јули 2011 година, дошол ред и на необележаниот гроб во Тексас. Земен е биолошки материјал и започнало ДНК тестирање. Неколку организации низ земјата учествувале во проектот, а средствата се собирале преку јавни донации.
Дури во јануари 2021 година, генетичарите конечно потврдиле: телата од тексашките мочуришта припаѓале на Дин и Тина Клаус.
Судбината на нивната ќерка – неверојатен пресврт
Во јуни истата година, тестирањето на ДНК покажало дека жителка на Аризона е во блиско сродство со убиената двојка. Жената, стара 44 години, побарала анонимност. Таа не се сеќава на своето рано детство — пораснала во хранителско семејство, има пет деца и две внучиња.
Се покажало дека на Нова година 1981 година, две непознати жени во бели облеки донеле бебе во една црква во Аризона. Му го предале на свештеникот без збор, и исчезнале. Девојчето добило ново име и била дадена во згрижувачко семејство.
Четири децении подоцна, кога вистината конечно излегла на виделина, таа веќе живеела под друго име и не знаела ништо за своите биолошки родители.
Таа одбила да го открие својот идентитет, иако ѝ биле понудени високи хонорари за настапи во телевизиски емисии, и одбила лична средба со својата баба. Се слушнале само еднаш — преку краток видео повик.
Што навистина им се случило на Дин и Тина?
Полицијата верува дека сектата извршила масакр врз своите поранешни следбеници, поштедувајќи го само нивното бебе.
Сепак, идентитетот и мотивите на култот никогаш не биле откриени.
И така, случајот на семејството Клаус останува една од најзагадочните и најтрагичните мистерии во американската криминалистичка историја — приказна што ни по 40 години не престанува да ја лади крвта.
Други вести
