Германските истражувачи го снимија необичното и досега недокументирано однесување на градските стаорци на две спелеолошки локации – Линебургер Калкберг и Сегебергер Калкберг.
Впечатливите слики од инфрацрвените камери покажуваат стаорци во „ноќни заседи“, за време на кои ловат лилјаци во лет.
Напад во целосен мрак
Во видеото гледаме кафеав стаорец кој ги користи своите мустаќи за да открие плен во целосен мрак, а потоа скока на лилјак и го убива со каснување во вратот.
„Ова е прв пат во Европа да забележиме толку изразени предаторски инстинкти кај обичниот градски стаорец“, велат научниците.
Во една сезона, само 15 стаорци можат да убијат помеѓу 2.000 и 8.000 лилјаци, што лесно може да доведе до колапс на локалната популација, објавува Дејли Меил.
„Резервоари“ на зоонотски патогени
Сепак, биолошката драма во гореспоменатите пештери има и пошироко епидемиолошко значење. Стаорците и лилјаците се сметаат за клучни „резервоари“ на зоонотски патогени – од коронавируси и парамиксовируси до хантавируси и хеморагични трески.
Директниот контакт помеѓу овие два вида ретко е документиран претходно, и токму таквата интеракција претставува потенцијална точка на пренос на вирусот од едно животно на друго – а можеби и на луѓето.
Иако нема докази дека веќе се случила таква транзиција, експертите предупредуваат дека новооткриените предатори во урбаните екосистеми би можеле да создадат поволни услови за еволуција на нови соеви.
„Превентивните мерки се едноставни“
„Ова е сигнал за тревога, но не и причина за паника. Превентивните мерки се едноставни и ефикасни“, нагласуваат истражувачите.
Тие вклучуваат отстранување на отпад и храна, контејнери отпорни на стаорци, како и контрола на инвазивни стаорци во близина на пештерите, сè за да се избегне непотребна близина помеѓу два важни, но потенцијално опасни животински видови.
Брзата акција, истакнува студијата, не само што ги штити лилјаците – туку и луѓето
Други вести
Живеењето во градовите не е „природно“ за нас – дали затоа страдаат нашите тела и умови?
