Првиот Европеец во една од идните мисии на американската агенција НАСА на Месечината ќе биде од Германија, а подоцна астронаути од Франција и Италија ќе ги следат неговите стапки.
Ова го објави генералниот директор на Европската вселенска агенција (ЕСА), Јозеф Ашбахер, во Бремен, Германија, каде што се состанува Советот на ЕСА, објави АФП.
ЕСА придонесува во американската програма „Артемис“ за враќање на луѓето на Месечината со изградба на вселенското летало „Орион“ и компоненти за иден лунарен орбитер.
Одложувана неколку пати, мисијата на НАСА со екипаж за летање околу Месечината – „Артемис 2“ со приватни партнери како што е „SpaceX“, треба да започне следната година, 2026 година, најдоцна во април, за да се тестира вселенското летало „Орион“ за време на 10-дневно патување на четири астронаути.
Тоа би бил клучен чекор за враќањето на Американците на Месечината, што американскиот претседател Доналд Трамп го најави како итно за време на неговиот прв мандат во 2017-2021 година.
Следната мисија „Артемис 3“ – првата од 1972 година што ќе слета двајца астронаути на површината на Месечината каде што треба да проверат дали навистина има замрзната вода, е планирана за 2027 или 2028 година.
За САД е важно ова да се случи пред Кина да го постигне тоа, чија цел е нивниот астронаут да слета на Месечината до 2030 година.
Други вести
