Во оваа европска метропола нема веќе издавање станови на туристи
Барселона, еден од најпосетуваните градови во Европа, планира да забрани изнајмување станови на туристи до 2029 година.
Властите ја донесоа оваа одлука за да го ублажат недостатокот на станови за локалното население во вториот по големина град во Шпанија.
Лиценците за 10.101 стан што моментално се одобрени за краткорочно изнајмување и достапни на платформи како Airbnb и Homeaway нема да бидат обновени кога ќе истечат во ноември 2028 година, откри градоначалникот на Барселона на прес-конференција.
„Градот не може да дозволи толку голем број станови да се користат за туризам во време кога пристапот до станови е тежок и кога се очигледни негативните ефекти од пренатрупаноста на туристите“, додаде тој.
Тоа значи дека „од 2029 година“, доколку нема застој, „туристичките апартмани какви што ги замислуваме денес ќе исчезнат од градот Барселона“.
Градовите како Берлин, Париз и Барселона велат дека веб-страниците за изнајмување домови за туристи ги лишуваат локалните жители од долгорочно изнајмување и ги зголемуваат цените на домовите што остануваат на пазарот.
Градоначалникот Колбони рече дека бумот на краткорочно изнајмување во Барселона помогнал да се зголемат кириите за 68 отсто во градот и трошоците за купување дом за 38 отсто.
„Се соочуваме со она што го сметаме за најголем проблем на Барселона“, рече тој.
Неговиот претходник, поранешната активистка за домување Ада Колау, го суспендираше издавањето на нови дозволи за туристички апартмани и забрани отворање на нови хотели во најпопуларните области во градот, како дел од напорите за намалување на прекумерниот туризам.
Сепак, тоа не го спречи бројот на посетители на градот, кој е познат по својата архитектура, музеи и плажи, да продолжи да се зголемува, особено по укинувањето на ограничувањата за патување поради пандемијата.
Неколку локални здруженија повикаа на демонстрации на 6 јули со слоганот: „Доста е! Стоп за туризмот!“.
Собирот ќе следи по други слични демонстрации одржани во последните месеци на други шпански туристички дестинации како Канарските Острови и Палма де Мајорка.
