Apple ги предупреди корисниците за можни хакерски напади
Компанијата не откри детали кои би можеле да им помогнат на напаѓачите во иднина, па не е јасно во кои земји е испратено предупредувањето.
Американската технолошка корпорација Apple ги предупреди корисниците на iPhone во 98 земји за можни напади на шпионски софтвер.
„Apple откри дека сте потенцијална цел на шпионски софтвер кој се обидува од далечина да го компромитира iPhone поврзан со вашата сметка на Apple ID“, се вели во пораката што ја добиле некои клиенти.
Пораката понатаму вели дека корисниците се цел на напади поради нивните лични или професионални активности, пренесува TechCrunch.
„Апсолутна безбедност при откривање на овие напади не е можна, но Apple е уверен во оваа проценка и ве советува сериозно да го сфатите
предупредувањето“, се вели во пораката.
Редовно испраќаат известувања
Компанијата не откри детали кои би можеле да им помогнат на напаѓачите во иднина, па не е јасно во кои земји е испратено предупредувањето.
Apple претходно издаде слично предупредување во април кога испрати известување до корисниците во 92 земји.
Компанијата од Купертино, Калифорнија, почнувајќи од 2021 година, редовно испраќа безбедносни предупредувања до корисниците и досега допрела до клиентите во 150 земји.
