Германци: Ова се десетте најопасни земји од ЕУ за возачите

Европските патишта одземаат повеќе од 20.000 животи секоја година. Кај некои ситуацијата е поволна, додека други претставуваат голем ризик, пишува германскиот портал t-online.

Повеќе од 20.000 луѓе загинаа во 2023 година во Европа во сообраќајни несреќи. Тоа значи 47 сообраќајни жртви на милион жители. Сепак, додека некои земји како Германија и Шведска бележат ниски стапки на несреќи, ризикот од сообраќајни несреќи со смртни последици во други земји е значително поголем, пишуваат тие.

Земји со мал број на несреќи

Германија и Шведска се меѓу најбезбедните земји од ЕУ.

Во Германија минатата година имало 34 жртви во сообраќајот на милион жители, додека Шведска е уште побезбедна со 22 жртви.

Земји со голем број на несреќи

Особено на југот и на истокот на Европа, ризикот е значително поголем. Во Словачка и Унгарија, бројот на жртви во сообраќајот е околу 50 на милион жители, што ги рангира меѓу десетте најнебезбедни региони. Најопасни земји за возачите во ЕУ се Бугарија и Романија.

Тие ги рангираа десетте земји со најголема стапка на несреќи, а Хрватска е блиску до врвот.

Десет земји со највисоки стапки на несреќи:

Бугарија (82 сообраќајни жртви на милион жители во 2023 година)
Романија (81)
Латвија (76)
Хрватска (71)
Португалија (61)
Грција (60)
Литванија (56)
Италија (52)
Полска (52)
Словачка (52)

План на ЕУ за побезбедни патишта

ЕУ си постави амбициозна цел: до 2050 година никој не треба да загинува во сообраќај. Овој план се нарекува „Визија нула“. Германците пишуваат дека планот веќе покажува резултати: додека повеќе од 51.000 луѓе загинаа на патиштата во ЕУ во 2001 година, 20 години подоцна тој број е намален за речиси 75 проценти.

Но, во последниве години, намалувањето е забавено. Дури и во 2021 година имало шест отсто повеќе жртви во сообраќајот. Затоа ЕУ планира дополнителни мерки за намалување на бројот на несреќи. Тие вклучуваат нови ограничувања на брзината (30 km/h во населени места), нулта толеранција за алкохол зад воланот и системи за помош на возачите. Имено, 95 отсто од сите сообраќајни несреќи се предизвикани од човечки грешки.