ФБИ ги откри тајните на руската психолошка војна: Сакаа да ги освојат срцата и умовите на Европејците
Рускиот тим ја идентификуваше Германија како особено ранлива цел за руското влијание.
Американската влада во средата обвини двајца руски државјани и заплени повеќе од 30 интернет домени поврзани со кампања за влијание врз американските избори. Но, масата на информации што ФБИ ги достави до судот ја разоткри и руската операција за манипулација со германски, француски, италијански и британски политичари, бизнисмени, новинари и други влијателни луѓе. Целта на кампањата на Кремљ во Европа беше да се посее поделба, да ја дискредитира Америка и да ја поткопа поддршката за Украина, според серија руски документи, меморандуми и записници од состаноците, пишува “Politico”.
Досието од 277 страници ги прикажува руските планови да ги освои срцата и умовите на Европејците. Меморандум од руска ИТ агенција опишува план за таргетирање луѓе преку вистински објави и коментари на социјалните мрежи за да се заобиколат бот-филтрите на компаниите за социјални медиуми. „Агенцијата за социјален дизајн“ работи по наредба на заменик-шефот на кабинетот на рускиот претседател Владимир Путин, Сергеј Кириенко, се вели во судската пријава на ФБИ. Во рускиот документ се вели дека целта на кампањата е „да предизвика рационални и емотивни реакции кај публиката“.
Операцијата, исто така, се потпираше на таканаречените “doppelgänger” домени за ширење на лажни написи и содржини кои се чинеше дека доаѓаат од западните медиуми. Домените вклучуваа фалсификати на “Reuters”, “Der Spiegel”, “Bild”, “Le Monde”, “Le Parisien”, “Welt”, “FAZ”, “Süddeutsche Zeitung” и други, а се плаќаа со криптовалути како биткоин, се вели во соопштението на ФБИ.
Рускиот тим ја идентификуваше Германија како особено ранлива цел за руското влијание. „Германците се позависни од Французите“, се вели во еден од руските документи, веројатно мислејќи на економската зависност на Германија од рускиот гас и извозот. ФБИ известува дека во документот стоело: „Прво и основно, мораме да ги дискредитираме САД, Велика Британија и НАТО. Дополнително, било наведено дека Германците треба да се убедат да се спротивстават на „неефективната политика на санкции“.
Друг документ од „Агенцијата за социјален дизајн“ опишува операција наречена „Поттикнување меѓународен конфликт“, насочена особено кон Франција и Германија. Нејзината цел беше да ги ескалира внатрешните тензии со цел да ги промовира интересите на Руската Федерација, како и да „влијае на конфликти во реалниот живот и вештачки да создава конфликтни ситуации“ преку лажни написи, инфлуенсери и насочени објави и коментари на социјалните мрежи. Во рускиот документ се додава дека целта е да се „дестабилизира социјалната ситуација“ во Франција и Германија преку „ширење дополнителни лажни наративи“.
